1.-3. bekkur er með fastan tíma einu sinni í viku í útikennslu. Hér eru nokkrar myndir frá því að þessi hópur fór ásamt leikskólanum út. Einnig er eitt myndband frá tónlistarstöðinni – sjá hér.
Author Archives: kristinerla
Mæla mæla
Nemendur í 4. – 5. bekk héldu áfram að vinna með stærðfræði í skóginum. Þeim var skipt í þrjá hópa. Hópur eitt fékk spæjarabók en í vetur ætla nemendur að velja sér eitt tré í skóginum og fylgjast með því. Nemendur völdu sér tré, mældu hæð og ummál þess og skráðu í spæjarabókina sína. Hópur tvö fékk það hlutverk að búa til rétthyrning úr greinum og mæla hversu marga fermetra ferningurinn er og þriðji hópurinn fór í skógarkeilu sem er alltaf jafn vinsælt. Veðrið lék við okkur það var sól en aðeins kalt og við sjáum rjúpu vappa um skóginn.
Vettvangsathugun
Unglingastigið er að vinna með tölfræði og notar til þess vettvangsathugun til að safna gögnum. Nemendur komu sér fyrir við gatnamót og skráðu hjá sér hversu margir bílar fóru framhjá, hve margir væru í hverjum bíl og hvers konar faratæki. Síðan unnu nemendur verkefni úr gögnunum.
Bak í bak
Í nóvember er þema útikennslu stærðfræði. Nemendur í 4. – 5. bekk unnu með tungumál stærðfræðinnar þar sem þeir röðuðu saman mynd úr hlutum í náttúrunni eftir fyrirmælum annars nemanda.
Nemendur unnu saman tvö og tvö. Þetta var skemmtilegur leikur sem reyndi á færni nemenda til að lýsa því sem þeir gerðu og framkvæma samkvæmt fyrirmælum. Það var grenjandi rigning en við létum það sko ekki stoppa okkur heldur nýttum nýja skýlið í Listigarðunum. 
Laufblaðaleit
Nemendur í 5. bekk fóru í laufblaðaleit. Þeir unnu 3 – 4 saman í hóp og fóru að finna laufblöð sem voru fjölbreytt að lit, formi og stærð. Við fórum í göngutúr á leið okkar inn í Kvennfélagsskóg. Þegar þangað var komið röðuðu nemendur laufblöðunum eftir lit, stærð og formum.
Hér má sjá stutt video af nemendum að vinna við flokkun laufblaða
Ráðstefna
Í september fóru þrír kennarar ásamt skólastjóra á ráðstefnuna „Ute ar inne“ í Linköping í Svíþjóð. Ráðstefnan stóð yfir í tvo daga og var sambland af vinnusmiðjum og fyrirlestrum. Það má með sanni segja að kennarar hafi komið endurnærðir heim með nýja þekkingu í farteskinu.
Tálga og myndverk 4. – 5. bekkjar
Nemendur unnu í tveimur hópum. Annar hópurinn æfði örugg hnífsbrögð og tálgaði spýtur sem þau fundu í skóginum.Hinn hópurinn týndi til ýmiskonar efnivið úr skóginum, köngla, laufblöð, börk osfrv og bjuggu til persónur úr því.
Skordýraleit 4.-5. bekkjar
Nemendur í 4.-5.bekk fara í útikennslu alla mánudaga. Í dag fórum við að leita að skordýrum þar sem nemendur skráðu og teiknuðu myndir af þeim skordýrum sem þau fundu. Stefnan er sett að leita aftur að skordýrum eftir mánuð og sjá muninn á fjölda skordýra sem finnast.
Útikennslunámskeið og skólaheimsókn
Í ágúst héldu Eygló og Kristín námskeið fyrir kennara á Suðurlandi á vegum Skólaþjónustu Árnesþings.
Námskeiðið byrjaði inn í skólanum þar sem farið var yfir sögu útináms í Flúðaskóla og sýndar myndir af ýmsum verkefnum. Því næst var útikennsluaðstaða Flúðaskóla sýnd og gæddum við okkur á nýbökuðu rúgbrauði sem við sóttum í hverinn.
Í september komu nokkrir kennarar úr grunnskólanum á Eyrarbakka og Stokkseyri í heimsókn til okkar til að kynna sér útikennslu í Flúðaskóla. Það er alltaf gaman og gefandi að fá heimsóknir og kynna það góða starf sem við erum að gera hér í Flúðaskóla.
Haustdagar
Núna í haust var allur skólinn saman í útivinnu hluta af degi. Tekið var til í skóginum, grisjað, lagað til í rjóðrum og sett kurl í stíga og rjóður. Í lokin fengum við okkur öll heitt kakó á eldstæðinu. Þessi vinna gekk mjög vel. Mikið gert á stuttum tíma
Þema mánaðarins
Í vetur verður hver mánaður tileinkaður ákveðnu þema.
- Byrjum í nóvember með veður
- Desember – tröll og forynjur
- Janúar – ljós og skuggar
- Febrúar – hreyfing
- Mars – stærðfræði
- Apríl – tungumál
- Maí – fuglar
Útivikur 2014 – 2015
Útkennsluvikur í vetur verða eftirfarandi:
13. – 17. október
8. – 12. desember
2. – 6. mars
Stýrihópur 2014-2015
Skólaárið 2014-2015 er stýrihópur í útikennslu í Flúðaskóla skipaður;
Kristínu Erlu Ingimarsdóttur smíðakennara og Eygló Jósephsdóttur myndmenntakennara.
Skógardagar vorið 2014
Skógardagar voru haldnir 19., 20. og 27. maí. Yngsta stig var fyrir hádegi á mánudeginum 19. maí. Miðstig var fyrir hádegi þriðjudaginn 20. maí og unglingastigið var þriðjudaginn 27. maí.
Kennarar á hverju stigi skipulögðu verkefnin.
Ýmis útikennsluverkefni veturinn 2013-2014
Ýmis skemmtileg verkefni hafa verið unnin í vetur.
- Það hefur verið samkennsla í samfélagsfræði í 3.-4. bekk. Þar sem útikennsla hefur verið fléttuð inn í námsefnið. Sem dæmi má nefna: stjörnuskoðun í skammdeginu í tengslum við námsefnið „Komdu og skoðaðu himingeiminn“, geimganga fuglatalning og skoðun, heimsókn í gróðurhús þar sem býflugur voru sérstaklega skoðaðar. Unnið úr efni fjörunnar, eftir fjöruferð á Stokkseyri.
- Yngsta stigið fór í útilegumannaleiki í tengslum við þema árshátíðarinnar.
- Litlu ólympíuleikarnir voru haldnir.
- 1.-3. bekkur fóru í ratleik þar voru ýmsar stöðvar s.s. athyglisleikir, stærðfræði og íslenska. Kosnir voru hópstjórar til að halda utan um sinn hóp.
- Hjá 1. og 2. bekk hefur verið einn fastur útikennslutími á viku sem Hrönn Axelsdóttir hefur séð um.
- Sundmót var haldið í maí líkt og undanfarin ár.
- Sleðaferð var hjá yngsta stigi. Farið var upp í Högnastaðarás.
- Skíðaferð var farin í febrúar hjá elsta stigi og í byrjun apríl hjá miðstigi.
- Haustganga var farin þar sem allur skólinn gekk Hvammsveginn að gömlu lauginni í Garði. Þar sagði Björg í Hvammi okkur sögu laugarinnar. Gengið var að Draugahver þar sagði Helgi í Hvammi okkur þjóðsöguna um hverinn.
- Náttúrufræðikennslan á mið- og elsta stigi hefur einnig markvisst farið fram utandyra svo og fleiri greinar.
